ТВ-серијата „Game of Thrones“ е една од најпопуларните, најгледаните и најуспешните серии на сите времиња, со обожаватели ширум светот.
Иако финалето на серијата не ги задоволи надежите и желбите на сите гледачи, серијата сепак остави силен впечаток и отвори простор за безброј теории и интересни споредби.
Светот на „Game of Thrones“ е толку комплициран и има толку многу ликови, што идеите за тоа што ги инспирирало овие ликови и нивните сложени односи може да бидат насекаде околу нас.
Порталот посветен на серијата, winteriscoming.net, состави интересна листа на ликовите споредувајќи ги со земји во Европа. На таа листа се најде и нашата земја.
Турција е споредена со обожаваната Денерис Таргеријан, Хрватска е Еларија Санд, Грција е Нед Старк, Бугарија – Лорас Тирел, Црна Гора – Брон, Србија е Арја Старк, а Босна и Херцеговина – Теон Грејџој.
Македонија го доби ликот на Давос Сиворт, советникот на Станис Баратеон, а потоа и на Џон Сноу.
Авторите на текстот велат дека кога барале со која земја да го поврзат, се воделе по неговото презиме (Seaworth) што се поврзува со вода, а Македонија е земја која може да се пофали со Врело – најдлабоката подводна пештера на светот – како и со Охридското Езеро, едно од најстарите во светот.