Саудиска Арабија, Турција и Египет се очекува наредната година да пополнат апликација за членство во БРИКС, открива претседателката на Форумот на овој светски блок.
Индијката Пурнима Ананд, која е претседателка на Меѓународниот форум на БРИКС, утринава за руски медиум откри дека уште три големи светски земји, како по население така и по економија, имаат намера наредната година да поднесат апликација за членство во оваа организација.
„Сите овие држави покажаа интерес за да се придружат и се подготвуваат да аплицираат за членство. Верувам дека тоа е доабр чекор бидејќи на проширувањето секогаш се гледа позитивно; тоа дефинитивно ќе го зајакне глобалното влијание на БРИКС“, изјави таа во интрервју за рускиот дневен весник Известия кој датира уште од 1917 година.
Нациите на БРИКС (Бразил, Русија, Индија, Кина и Јужна Африка) сочинуваат над 40% од глобалното население и речиси една четвртина од светскиот БДП. Наведените цели на блокот вклучуваат промовирање на мирот, безбедноста, развојот и соработката на глобално ниво и придонесување за развојот на човештвото.
Ананд рече дека прашањето за проширување било покренато за време на овогодинешниот самит на БРИКС, кој се одржа кон крајот на јуни во Пекинг.
Претседателката на Форумот на БРИКС рече дека се надева оти приклучувањето на Саудиска Арабија, Турција и Египет нема да потрае многу време, со оглед на тоа што тие „веќе се ангажирани во процесот“, иако се сомнева дека и трите во истовремено ќе се приклучат во алијансата.
„Се надевам дека овие земји ќе се приклучат на БРИКС наскоро, бидејќи сите претставници на основните членки се заинтересирани за проширување. Така што тоа ќе се слуши многу брзо“, додаде таа.
Веста за плановите на трите нации да се приклучат на БРИКС доаѓа откако Иран и Аргентина официјално аплицираа за членство кон крајот на јуни, при што портпаролот на иранското Министерство за надворешни работи, Саид Хатибзаде, го опиша блокот како „многу креативен механизам со широки аспекти“.
БРИКС е формиран во септември 2006 година како БРИК. Името е акроним од првите букви на сите земји членки (Бразил, Русија, Индија, Кина), а откако во 2010 се приклучи Јужна Африка (South Africa) стана БРИКС.
Интерес за приклучување во БРИКС имаат искажано и Мексико, Индонезија, Нигерија, Бангладеш, Судан, Сирија и Пакистан, но никој од нив сѐ уште не се одлучил за апликација.
