Ситуацијата во Турција е алармантна – вредноста на лирата вртоглаво опаѓа, берзите бележат пад, а каматните стапки скокнаа.
Земјата е нова мета на двојно повисоките царини на челик и алуминиум на американскиот претседател Доналд Трамп што скокнаа од 25 на 50, односно од 10 на 20 отсто.
Трамп на Twitter напиша дека односите на САД со Турција „сега не се добри“. Вредноста на турската лира веднаш падна за 10 отсто поради стравувањата на инвеститорите околу економските политики на претседателот Реџеп Тајип Ердоган и санкциите на САД. По твитот на Трамп, падот изнесуваше 19%.
Турците се бесни поради ваквиот потег на Трамп и бурно реагираа на промените. Своето незадоволство го изразија со уништување на сѐ што е американско и објавуваат снимки на социјалните мрежи како палат американски долари и уништуваат ајфони.
Ердоган ги повика граѓаните да не се грижат за падот на валутата и ги повика да ги сменат своите резерви на девизи во лири.
„Тоа ќе биде одговорот на мојот народ за оние кои водат економскa војна против нас“, рече Ердоган.