Пандемијата со COVID-19 дефинитивно и неповратно ни ги смени животите, вклучувајќи го и начинот на кој работиме.
Тоа е особено точно за професиите за кои не е потребно да се биде физички присутен на работното место. Милиони фриленсери ширум светот со години покажуваат дека тоа не само што е изводливо, туку многу често е и попродуктивно за вработениот, но и за компанијата.
Одлуката на компанијата Twitter да им дозволи на вработените да работат од дома „засекогаш“ ја разбранува бизнис заедницата. Многумина предвидуваат дека технолошките компании ќе го следат примерот, а еден експерт за технолошки иновации рече дека ваквиот чекор на една светски позната компанија е „вест што дефинира една ера“.
„Некои луѓе можеби не го сфаќаат ова толку серизно како Twitter, но може да научиме многу за флексибилноста на работното место од Силициумската долина“, вели професорот Сре Сренивасан од Факултетот за новинарство при Универзитетот Стоуни Брук.
„Владееше едно размислување дека работењето од дома е крадење од шефот и дека директната комуникација со колегите е поважна. Но, луѓето покажуваат дека може да бидат многу попродуктивни и да ги завршуваат задачите работејќи од дома. Многу луѓе ми кажуваат дека понапорно работат од дома и дека понекогаш се преморени“, вели тој.