Twitter денеска отстрани илјадници сметки од Србија, Египет, Хондурас, Индонезија и Саудиска Арабија за постапување според владини директиви или за промовирање провладина содржина.
Како што пренесуваат странските агенции, Twitter и останатите социјални мрежи се под притисок да ги отстранат сите дезинформации и говор на омраза од нивните платформи, кои исто така се зголемени поради пандемијата на коронавирусот.
Во соопштението на Twitter се наведува дека се отстранени сметките затоа што тие ги прекршиле политиките на платформата и биле намерно создадени за да ја поткопаат јавната расправа.
Отстранети се 2.541 сметка што се поврзуваат со египетскиот весник El Fagr (الفجر) поради создавање лажни сметки кои генерираа пораки кои ги критикуваат Иран, Катар и Турција.
„Информациите што ги добивме однадвор укажуваат дека сметките ги следеле упатствата на египетската влада“, се вели во соопштението на Twitter.
Компанијата отстрани и 3.104 лажни сметки што беа создадени под единствена IP-адреса во Хондурас од владин службеник за споделување претседателски содржини.