Поранешниот албански претседател Илир Мета е приведен во полиција под обвинение за корупција, соопшти неговиот портпарол и адвокат.
Портпаролот на Мета, Теди Блуши, на прес-конференција рече дека апсењето е „непримерно“ и дека „сите патриотски и искрени Албанци ќе го осудат“.
Блуши зборуваше за сликите на локалните медиуми на кои се гледа како маскираната локална полиција запира црн автомобил и наводно го изнесува Мета, кој даваше отпор при апсењето.
„Владата ќе ја плати цената на секоја улица и на секој плоштад“, рече Блуши, на новинарско прашање дали поддржувачите на Мета ќе организираат протести.
Специјалната канцеларија за борба против корупција и организиран криминал SPAK не одговори веднаш на барањето за коментар, но Reporter објави дека Мета е обвинет за корупција, перење пари и криење богатство. И други медиуми ги објавија истите наводи.
Адвокатот на Мета, Генци Ѓокутај, го потврди апсењето по обвинение за корупција, што Мета го демантираше. Тој не откри други детали.
Мета (55) беше претседател од 2017 до 2022 година, а претходно беше премиер и претседател на парламентот. Но, тој не е првиот опозициски лидер кој се соочува со обвинувања за корупција.
На 30 септември, приврзаниците на главната опозициска група Демократска партија запалија дрвени столчиња пред парламентот во знак на протест поради тоа што еден од нивните политичари, Ервин Салијањи, беше осуден на една година затвор поради политички мотивирани обвиненија.
Претходно во септември, лидерот на Демократската партија, Сали Бериша, беше обвинет за корупција за дејствија за време на неговиот мандат како премиер. Бериша, исто така, негира дека направил нешто лошо.
Демократската партија го обвинува актуелниот премиер Еди Рама дека стои зад кривичното гонење на нејзините членови. Рама ги негира обвинувањата.
