Главниот воен советник на турскиот претседател Реџеп Таип Ердоган, Али Јазиџи е уапсен под обвинение за вмешаност во обидот за државен преврат, објави CNN Turk.
Телевизијата Al Arabia, исто така, но без да наведе име објави од Истанбул дека е уапсен помошникот на претседателот Ердоган за воени прашања.
Претходно беше објавено дека во јужниот регион Адана е уапсен командантот на воздухопловната база Инџурлик, генералот Бекир Ерџан Ван заедно со уште десет офицери, кои се обвинети дека се главните организатори на неуспешниот воен удар во кој загинаа 265 луѓе, а ранети се 1.400 луѓе.
„Сите организатори на обидот за државен преврат се уапсени“, се наведува во соопштението што го објави командата на турската армија. Притоа се истакнува дека „турскиот народ ја имал главната улога во спречувањето на пучот“.
Претходно беше објавено дека се уапсени повеќе од 6.000 луѓе осомничени за поврзаност со подготовката и обидот за изведување на воениот ударот. Во овие рамки уапсени се 426 судии и обвинители низ цела Турција, од кои двајца се уставни судии, а само во Истанбул се уапсени 39 обвинители и 71 судии.