Американската полиција вчера уапси лице кое наводно се обидело да помине контролен пункт во градот со фалсификувана дозвола за присуство на инаугурацијата на новоизбраниот американски претседател Џо Бајден, а воедно поседувало и наполнет пиштол со повеќе од 500 парчиња муниција, пренесоа американските медиуми.
Во полицискиот извештај се наведува дека кај уапсeниот 31-годишен Весли Ален Билер, при претрес на еден од контролните пунктови во Вашингтон, е пронајден пиштол Glock. Тој, исто така, имал неовластено одобрение да присуствува на церемонијата на инаугурацијата на новиот претседател, додаваат медиумите.
Полицијата откри повеќе од 500 парчиња муниција, вклучително и шаржер за пиштол и куршуми за ловџиска пушка.
Белер бил уапсен за поседување нерегистрирано огнено оружје и поседување нерегистрирана муниција.
Припадниците на Националната гарда ги засилија локалните безбедносни сили во главниот град на САД и повеќе од 25.000 припадници на безбедносните сили се очекува да присуствуваат на церемонијата на 20 јануари.
Мерките се засилени поради смртоносниот упад на демонстрантите во Капитол на 6 јануари, кога загинаа најмалку пет лица.
Исто така, регистрирани се и закани од екстремната десница дека може да дојде до повеќе насилство во главниот град.