Повеќе блиски соработници на рускиот опозициски лидер Алексеј Навални се приведени во текот на денешниот ден, а судот ја одби жалбата за неговото апсење. Меѓу приведените се брат му, Олег Навални, како и неговата соработничка Љубов Собол.
Тие се уапсени поради кршење на епидемиолошките мерки воведени поради пандемијата на коронавирусот, по саботните протести низ земјата, открија соработници на Навални.
Од истата причина притворени се и активистките Марија Алехина и Анастасија Васиљева.
Рускиот суд денеска ја одби жалбата за 30-дневниот притвор на Навални, а сослушувањето е закажано за следниот месец.
Навални преку видеолинк се појави во судот во градот Кимки, тој и понатаму е во притворскиот центар Матрошкаја Тишина во Москва. Следното појавување во судот е закажано за 2 февруари, кога судот треба да одлучи за неговата три и пол годишна казна затвор за измама.
Реакцијата на Навални, по објаснувањето на судијата за одбивање на жалбата е дека го очекувал тоа.
„Сè ми беше јасно уште пред сослушувањето во судот“, изјави Навални, пренесе CNN.
