Специјална единица на словачката полиција денеска уапси тројца истакнати судии и двајца наводни соучесници поради сомнение дека се вклучени во корупција, јави ДПА.
Полицијата на својата страница на Facebook денеска соопшти дека е поведена кривична постапка против уште шест лица.
Германската новинска агенција, повикувајќи се на наводи на локалните медиуми, соопшти дека се уапсени шефот на регионалниот суд во Жилина, шефот на тамошниот Окружен суд и пензиониран судија.
Од убиството на истражувачкиот новинар Јан Куцијак и неговата свршеница во февруари 2018 година, словачката полиција истражува коруптивни врски во судството.
Милионерот Маријан Кочнер, обвинет дека го нарачал убиството на новинарот, се наведува дека систематски поткупувал и уценувал судии и обвинители со цел да купи ослободителни пресуди во неговите бројни измамнички скандали. Убиството на новинарот и истрагата што следеше открија и други случаи на корупција во судството.
Во март годинава беа уапсени тринаесет судии, вклучувајќи ја и поранешната државна секретарка за правда, Моника Јанковска. За неа се вели дека манипулирала со судските постапки во име на Кочнер.
На 3 септември, Кочнер беше изненадувачки ослободен од обвинението дека го нарачал убиството на Куцијак, кој известувал за матните зделки на Кочнер, но и за други случаи на корупција.
По убиството имаше масовни демонстрации што доведоа до оставка на тогашната влада. Ослободителната пресуда на Кочнер поради недостиг на докази предизвика негодување на меѓународно ниво, но пресудата уште не е конечна бидејќи јавниот обвинител поднесе жалба. пренесува ДПА.