Рускиот новинар Аркадиј Бабченко, кој наводно вчера беше убиен во неговиот стан во Киев, денеска се појави жив, комплетно здрав на прес-конференција во главниот град на Украина.
Бабченко предизвика вистинска сензација на прес-конференцијата во Киев, каде беше поздравен со воздишки, изненадени лица и аплаузи.
„Најпрво, би сакал да ви се извинам за сите работи низ кои поминавте, бидејќи знам какво е чувството кога треба да закопаш колега. Посебно би сакал да ѝ се извинам на мојата жена, сакам да ѝ кажам дека ми е многу жал поради пеколот низ кој таа мораше да помине“, рече Бабченко.
Аркадиј Бабченко и претставниците на украинската полиција рекоа дека цена од 40.000 долари била ставена за неговата глава, и дека единствениот начин да откријат кој стои зад оваа „валкана игра“ беше да се се исценира неговото убиство.
За подготовка на лажното убиство биле потребни 2 месеци, а шефот на безбедносните сили на Украина, Васил Хрицак, рече дека веќе имаат фатено двајца осомничени, кои во моментов се во притвор. Како дел од лажното убиство, полицијата излезе со соопштение дека Бабченко починал на пат кон болницата.
Лажното убиство веќе ги подгреа и онака разгорените страсти помеѓу Русија и Украина, бидејќи двете страни се обвинуваа кој би можел да го убие Бабченко.
