Европската фудбалска асоцијација потврди денеска дека нема промени во планот финалето на Лигата на шампиони на 29 мај да се игра во Истанбул, и покрај тоа што пандемијата на коронавирус предизвика воведување трет карантин во Турција, кој од вчера стапи во сила.
Дел од француските и британските медиуми, повикувајќи се на анонимни извори, објавија дека УЕФА ја разгледувала можноста, од здравствени причини да го премести финалето на друга локација.
– Финалето ќе се игра во Истанбул на 29 мај, но со ограничен број гледачи. Добивме ветување дека карантинот во Турција е привремена мерка до 17 мај и оти нема да има влијание врз натпреварот, соопшти УЕФА.
Со најголем број заразени на европскиот континент, Турција во вчера вечер влезе во нов карантин со затворање на сите компании чија дејност не е неопходна во секојдневниот живот, како и ограничено движење меѓу регионите во земјата.
