УЕФА го промени терминот за деби европскиот натпревар на македонскиот куп победник Тиквеш.
Наместо на скопската жештина од 17 часот, УЕФА денеска одлучи натпреварот против исландскиот тим Бреидаблик да се игра во вечерен термин од 20:30 часот.
Температурите кои деновиве во Скопје достигнуваат речиси до 40°C ја натераа УЕФА да реагира кога е во прашање натпреварот од 1. квалификациско коло во Конференциската лига. Тиквеш одлучи натпреварот против Исланѓаните да се игра од 17 часот, што УЕФА го имаше прифатено. Но, поради екстремната топлина денеска дојде до промена.
„Се известува спортската јавност, УЕФА го презакажа терминот на натпреварот ТИКВЕШ - БРЕИДАБЛИК и истиот ќе се одигра на 11.07.2024 во 20:30 часот, поради високите температури‼️“, соопшти кавадаречкиот клуб.
Неофицијално, Исланѓаните биле тие што деновиве вршеле притисок во УЕФА да се промени терминот.
Промената на терминот и финансиски ќе се одрази врз Тиквеш бидејќи изнајмувањето на стадионот чини значително повеќе кога се користат рефлекторите. Од друга страна, бидејќи се игра во работен ден повеќе публика ќе може да дојде во вечерен термин.
Натпреварот Тиквеш - Бреидаблик се игра в четврток, сега од 20:30 часот, а билетите се веќе во продажба во Кавадарци и тоа во „Стрит бар“, „Инфинити кафе“ и „Дистрикт кафе“. Во Скопје ќе можат да се купат на денот на натпреварот на билетарницата на Националната Арена „Тодор Проески“.
Според УХМР, високите температури ќе се задржат и во наредните денови и постепено и ќе се зголемуваат.
