Европската фудбалска федерација (УЕФА) објави дека атрактивната бразилска пејачка Анита ќе настапи за време на финалето на Лигата на шампионите.
Имено, Анита на 10 јуни ќе ја забавува публиката во Истанбул заедно со нигерискиот музичар Бурна Бој пред натпреварот помеѓу Интер и Манчестер Сити.
„Мило ми е што ја слушнав оваа вест и едвај чекам да се појавам на сцената за време на финалето. Се надевам дека ќе им приредиме одлично шоу на гледачите ширум светот. Не пропуштајте“, порача Анита.
Инаку, Бразилката минатата година го имаше најголемиот светски хит „Envolver“ и достигна неверојатна популарност.
Со рекордната продажба на нејзиниот петти албум, 30-годишната Бразилка беше номинирана за наградата Греми.
Првиот голем успех го постигна пред 10 години кога се појави во музичко шоу во нејзината земја, а со текот на времето стана популарна и надвор од Јужна Америка.
Пред осум години беше прогласена и за најсекси жена според гласовите на читателите на магазинот VIP.
