Унијата на европските фудбалски асоцијации (УЕФА) се повлече од тужбите против Реал Мадрид, Барселона и Јувентус како иницијатори на проектот Суперлига.
Иако беа најавувани големи санкции за трите клуба кои сакаа да создадат лига која УЕФА не ја поддржува, очигледно нема да има ништо од тоа.
УЕФА дури побара трите клуба да се повлечат од Суперлигата, но Реал, Барселона и Јувентус не се одлучија за тој потег. Причината е што Судот во Мадрид минатата недела одлучи дека УЕФА нема право да ги казнува трите клуба кои сѐ уште се членови на Суперлигата.
„Откако беше запрен истражниот процес против Јувентус, Реал Мадрид и Барселона за можно прекршување на правилникот на УЕФА, жалбеното тело на УЕФА ја поништи тужбата како да не била ни покрената“, се вели во соопштението на чадорската куќа на европскиот фудбал.
УЕФА соопшти дека ќе продолжи со сите потребни чекори за заштита на натпреварите што се под нејзина јурисдикција.