Фудбал

УЕФА размислува за нови промени во Лигата на шампиони

16. јануари 2020 - 17:35 | МИА

Европската фудбалска асоцијација (УЕФА) е под притисок од одделни клубови Лигата на шампиони да прерасне во проект од затворен тип.

За актуелниот формат има гаранции дека нема да се реформира до 2024 година, но веќе се шпекулира дека промени дотогаш, сепак, ќе има.

Во Европската куќа на фудбалот се разгледува опција за додавање на четири дополнителни датуми во календарот, поточно плус две недели за што постојат и неколку теории за зголемување на бројот на натпревари од сезоната 2024/25.

Засега нема прецизни информации во кој дел од календарот ќе бидат вметнати дополнителните натпревари, меѓутоа Sky Sports пишува дека промени ќе претрпи групната фаза.

Замислата е проширување на групите од четири на шест тима за најбогатите да играат почесто. Со тоа, пак, се отвора дилема дали ќе се задоволат апетитите на најбогатите екипи кои инсистираат на затворена лига со цел повеќе пари и возбудувања.

Втората опција е нешто поотворена. Би опфатила две групни фази, а во втората би влегле осум клубови кои би биле поделени во две групи по четири. На тој начин најбогатите ќе одиграат повеќе меѓусебни натпревари на пролет, а место во полуфинале да има за најдобрите два тима од секоја група.

Коментирај