Германија денеска од 21 часот во Минхен го игра натпреварот од последното коло во групната фаза од ЕУРО 2020, против Унгарија.
Германците сакаа да ја осветлат Алијанц Арена во боите на виножитото за време на натпреварот како порака до унгарската влада предводена од конзервативниот премиер Виктор Орбан, која неодамна донесе закон за забрана за „промовирање на хомосексуалноста“.
УЕФА стави вето на одлуката на Германците, сметајќи дека таа има политички контекст. И покрај тоа, пишуваат германските медиуми, Орбан се откажал од доаѓањето на мечот во Минхен.
По бурните реакции на забраната, не само од ЛГБТИК заедницата, туку и од бројни групи за човекови права, УЕФА денес во своето лого ги имплементираше боите на виножито и издаде не помалку контроверзна изјава под наслов „УЕФА го почитува виножитото“.
„Денес, УЕФА гордо ги носи боите на виножито. Тоа е симбол што ги отелотворува нашите основни вредности, промовира сè во што веруваме - повеќе од само егалитарно општество, толерантно кон сите, без оглед на потеклото, религијата или полот“.
Некои ја толкуваа одлуката на УЕФА да го одбие предлогот на Градот Минхен да го осветли стадионот со бои на виножито за натпреварот на ЕУРО 2020 како политичка. Напротив, самото барање е политичко, поврзано со доаѓањето на унгарската репрезентација на стадионот за вечерашниот натпревар со Германија.
За УЕФА, „виножитото не е политички симбол, туку е знак на нашата силна посветеност кон поразновидно и поинклузивно општество“, се вели во соопштението на УЕФА.
Коментарите на соопштението на социјалните мрежи се измешани – едни сметаат дека со ваквиот потег УЕФА се пишмани и сака да остави впечаток на прогресивна организација, додека други ја критикуваат УЕФА за противречностите и лицемерието во соопштението, со доминантна порака дека нејзината одлука за забранана на осветлувањето на Алијанц Арена е политичка за да не се навреди унгарската влада.
