Даниел Кормие стана првиот ММА борач кој успешно го одбрани појасот во две тежински категории во УФЦ. Тоа се случи синоќа, кога по само две минути и 14 секунди успеа да го натера Дерик Луис да ја предаде борбата.
Шампионот уште од самиот почеток на борбата која се одржа во Медисон Сквер Гарден тргна со намера да го сруши Луис и да го принуди на борење на партерот.
Некогашниот затвореник во почетокот на првата рунда се наоѓаше на грб, но некако успеа да се одбрани и да ја дочека втората рунда. А таму, следеше неговата шанса за победа. Предизвикувачот од Тексас повторно имаше прилика до крајот на борбата да се врати и да оствари победа, но чекаше предолго и му дозволи на Кормие да нападне и да заземе подобра позиција.
Кормие успешно се провлече зад грбот на противникот, ја позиционираше раката околу неговиот врат и почна да го гуши Луис, кој во последната борба го нокаутираше Волков.
Следниот борач кој ќе добие шанса да му го одземе појасот на Кормие е Брок Леснар, но откако ќе ги помине сите допинг тестови поради кои веќе две години не е дел од УФЦ борбите.
