Аманда Нуњез синоќа славеше во главната борба на вечерта во Лас Вегас против Фелиша Спенсер, откако со одлука на судијата ја одбрани титулата во перолесна категорија во УФЦ.
По борбата, Нуњез покажа што навистина значи да се биде најдобар во историјата на еден спорт (GOAT).
Кога станува збор за Нуњез, нема сомнеж дека зборуваме за најдобрата шампионка која некогаш сме ја гледале во ММА спортот, а со тоа и во УФЦ. Таа е актуелна шампионка во перолесна и бантам категорија и успешно ги има одбрането и двете титули.
Бразилката нема изгубено борба од 2014 година и синоќа ја запиша 11-тата победа во низа. Нуњез доминираше над Канаѓанката Спенсер и запиша рутинска победа, додека има впечаток дека борбата можеше да се прекине и порано. Според официјалната статистика, Нуњез имала 124 значајни удари, што е дури 80 повеќе во споредба со Спенсер.
По борбата, Нуњез го стави нејзиниот појас на рамото на Спенсер и на тој начин ѝ оддаде почит за отпорот кој ѝ го пружи во борбата во која практично немаше шанси за победа. Спенсер успеа да остане на нозе до судиската одлука. По ваквиот потег на Бразилката, можеше да се види дека Спенсер се расплака од среќа.
„Не сум изненадена што судијата не ја прекина борбата бидејќи знам дека е многу цврста. Уште пред борбата кажував дека знам за што е способна и дека е тежок противник. Добро ја проучував. Знаев дека морам да бидам доминантна и остра како кактус“, рече Нуњез по борбата.
