Руската пејачка Јулија Самоилова нема да настапува на Евровизија во Киев. Од Украина доби 3-годишна забрана за влегување во земјата.
Одлуката ја донесе Службата за безбедност на Украина, затоа што руската изведувачка Самоилова во 2015 година пеела на Крим – анектираниот дел на Русија.
Таа требаше да ја претставува својата земја на натпреварот „Евровизија“ во Киев кој се одржува во мај.
Украина посетата на „привремено окупираниот“ Крим, без претходна согласност на Киев, го третира како кривично дело.
Од „Евровизија“ велат дека земјата домаќин има право да одлучи дали на некој учесник ќе му дозволи да настапува во земјата.
Веста за забраната од страна на СБУ ја објави портпаролката Елена Гитлјанскаја, а руските медиуми информацијата ја објавија уште на 20 март.
Поради медицинска грешка Самоилова од дете е во инвалидска количка.
За време на изборот за песна на Евровизија, кој традиционално се одржува на рускиот државен „Прв канал“ нејзината песна „Flame is Burning“ ја коментираа како провокација.
