Украинскиот хокеарски репрезентативец Андриј Денискин доби едногодишна суспензија од Меѓународната хокеарска федерација (ИИХФ) поради навредување на противнички играч на расна основа, потврди организацијата.
„Расистичките гестови, коментари или постапки немаат апсолутно никакво место во хокејот на мраз или било каде“, рече претседателот на ИИХФ, Лук Тардиф.
Денискин првично беше суспендиран на 13 натпревари поради инцидент кога неговиот тим Кременчук го победи Донбас со 3:2 на крајот на септември минатата година.
„Постапките на Денискин се целосно неприфатливи и нема да бидат толерирани. Иако тој веќе одлежа суспензија од 13 натпревари, утврдивме дека заслужува дополнителна казна“, заклучи Тардиф.
Во 35. минута Денискин се судри со играч на Донбас и двајцата беа исклучени. Сепак, пред да се упати кон клупата, Денискин направи расистички гест кон противничкиот хокеар Џејлен Смерек, кој е Афроамериканец.
Денискин имитираше лупење банана, а потоа и консумирање, што го снимија камерите по што и покрај извинувањето доби првична суспензија од 13 натпревари, но со опција да ја смали на 3 доколку плати 1.870 американски долари, што предизвика остри реакции во хокеарскиот свет. Поранешни и сегашни НХЛ играчи како Назем Кадри, ЏејТи Браун, Ентони Дуклер, Жорж Ларак и Аким Алиу јавно искажаа поддршка кон Смерек.
Смерек одлучно изјави дека нема повеќе да игра во украинската лига сѐ додека Денискин не добие заслужена сериозна казна. На 10 октомври 2021 Смерек и Донбас спогодбено го раскинаа договорот.
Дури сега дојде одлуката Денискин да добие построга казна, која целосно ја заслужи.