Шпанскиот страгет Унаи Емери (46) беше претставен како нов тренер на Арсенал, откако Арсен Венгер го напушти клубот по 22 години на клупата. Одлуката да се назначи Емери беше донесена во понеделникот, додека денес се случи официјалното претставување.
Унаи Емери беше избран за наследник на Арсен Венгер откако во понеделникот Микел Артета го одби лондонскиот клуб и реши да остане асистент на Пеп Гвардиола во Манчестер Сити.
Шпанскиот тренер само што ја заврши сезоната со ПСЖ, каде освои тројна круна (Француската лига и двата Купа на Франција). Иако беше мета на многу критики во последните две години, посебно заради неговите неуспеси во Лигата на шампионите, Емери има повеќе од солидно тренерско резиме, а најмногу се истакнуваат неговите успеси во Севиља, со која успеа да освои три последователни титули во Европа Лигата.
„Пресреќен сум што сум дел од еден од најголемите клубови во фудбалскиот свет. Арсенал е име кое е познато насекаде низ светот и сите ја почитуваат нивната посветеност кон младите играчи, нивните навивачи и начинот на кој раководството управува со клубот. Навистина сум возбуден што ја добивам одговорноста да почнам ново поглавје во историјата на Арсенал“, изјави Унаи Емери на првото обраќање кон јавноста.
Задачата на Емери по доаѓањето во Арсенал ќе биде да го врати лондонскиот клуб во фудбалската елита и наредната сезона да обезбеди пласман во Лигата на шампионите. Буџетот за трансфери кој го доби за следната сезона ќе биде околу 50 милиони фунти, што изгледа како многу мала сума, посебно за тим од Премиер лигата.
Претходно во кариерата Унаи Емери работеше во Лорка Депортиво, Алмерија, Валенсија, Спартак Москва, Севиља и на крајот, ПСЖ.