Тренерот на Парис Сен Жермен Унај Емери, изјави дека актуелниот првак на Европа, Реал Мадрид, нема поима што го очекува во повратниот натпревар од осминафиналето во Лигата на шампионите, кој ќе се одигра за две седмици.
ПСЖ моментално се наоѓа на првата позиција во француската Лига 1, а во следното коло ги очекува дерби дуел со Марсеј.
О друга страна, во првиот натпревар во осминафиналето во рамките на Лигата на шампионите, Парижаните беа поразени со 3:1 од Реал Мадрид.
Унај Емери смета дека следните два натпревари се многу важни за ПСЖ и дека играчите на Марсеј и Реал се тие кои не се подготвени за она што ги очекува на „Паркот на принцовите“.
„Во поголемиот дел од натпреварите оваа сезона покажавме на што сме способни, а посебно моќно се чувствуваме на „Паркот на принцовите“. Марсеј и Реал Мадрид мораат да дојдат во Париз, но немаат поима што го очекува овде. Пред нас се две многу важни средби за кои посебно ќе се подготвуваме“, изјави Емери.
„Нашата екипа е одлична и многу силна, но овие натпревари се нешто посебно. Ќе го дадеме својот максимум на наш терен и не размислуваме за ништо друго, туку само за она што следува. Размислуваме само за „Паркот на принцовите“, нашиот дом кој заедно ќе го браниме со нашите навивачи“, заклучи Емери.
