Унгарскиот парламент денеска гласаше за закон со кој се одобрува влезот на Финска во НАТО, откако нејзината апликација за членство беше прифатена од сите 30 членки на Алијансата.
Финска и Шведска поднесоа барање за влез во НАТО минатата година како одговор на руската инвазија на Украина, но процесот беше закочен од Турција и Унгарија.
Иако финското барање сега е прифатено, шведското сѐ уште се чека во унгарскиот парламент. Турскиот претседател Реџеп Тајип Ердоган минатата недела изјави дека турскиот парламент ќе го започне процесот за ратификација на членството на Финска, но барањето на Шведска сепак ќе остане.
Не е познато кога унгарскиот парламент ќе гласа за членството на Шведска
Генералниот секретар на НАТО, Јенс Столтенберг, упорно ги повика Турција и Унгарија да ги ратификуваат двете членства. Сѐ уште не е познато кога унгарскиот парламент ќе гласа за членството на Шведска.
Партијата Фидес на премиерот Виктор Орбан најави дека ќе ја поддржи ратификацијата, но минатата недела пратеникот на Фидес Чаба Хенде рече дека Шведска сепак ќе треба да направи повеќе за да одговори на загриженоста на некои од неговите колеги парламентарци.
Процесот на ратификација на Унгарија е закочен во парламентот од јули, а во февруари Орбан ги обвини Финска и Шведска дека шират „директни лаги“ за демократијата и владеењето на правото во Унгарија.
