Уште два земјотреса регистрирани кај Гостивар

Уште два земјотреса денеска се регистрирани во близина на Гостивар.

Првиот со јачина од 3,8 беше регистриран околу 12 часот попладне, на 18 км југозападно од Гостивар. Вториот околу 13 часот и 25 минути, 3,6 степени по Рихтер со епицентар во гостиварското подрачје, на 16 км југозападно од градот, регистрираше EMSC.

Инаку, рано изутринава во 04 часот и 54 минути беше регистриран земјотрес со локална Рихтерова магнитуда од 5 степени во епицентралното подрачје Тетово-Гостивар на 50 километри југозападно од Скопје.

Сеизмолошката опсерваторија при Природно-математичкиот факултет во Скопје соопшти дека земјотресот најсилно беше почувствуван од населението во Гостивар и Маврово со пет степени според Европската макросеизмичка скала, во Тетово и Скопје со четири, а во Битола, Прилеп и околината со три степени.