Косовската претседателка Вјоса Османи потврди дека Кенија го признала Косово како независна и суверена држава со одлука потпишана од претседателот Вилијам Руто.
„Република Косово ја поздравува одлуката на Република Кенија да го признае Косово како независна и суверена држава, преку одлука потпишана од претседателот Руто и официјално испратена до Претседателството пред неколку дена“, напиша Османи на својот Facebook профил.
„Ова признавање е доказ за континуираната поддршка за правото на народот на Косово на слобода, независност, суверенитет и територијален интегритет. Во исто време, тоа е и признание за долгото страдање и вековната жртва на народот на Косово за слобода“, додаде таа.
Во име на институциите и граѓаните на Косово, таа изрази благодарност до кенискиот претседател Вилијам Руто за „оваа праведна и важна одлука, како и до кениските институции и граѓаните кои го поддржаа овој голем дипломатски чекор“.
Таа додаде дека Косово продолжува да напредува на патот на интеграцијата и зајакнувањето на својата меѓународна позиција. Таа додаде дека односите меѓу Косово и Кенија се продлабочуваат во различни области, па затоа очекуваат многу брзо воспоставување дипломатски односи, градење силно и долгогодишно партнерство меѓу двете земји и нашите народи.
Кенија е 105-та од 193-те членки на ОН што го признаа Косово. Со оглед на тоа што Русија и Кина, две постојани членки на Советот за безбедност, не ја признаа Приштина, Косово сè уште не е дел од Обединетите нации.
