И покрај оперативниот зафат, боксерот воопшто не се разбуди од кома и синоќа им подлегна на повредите здобиени од пресметката со Чарлс Конвел.
Деј падна во кома со 10-тата рунда кога Конвел со два кроше удари го нокаутираше доаѓајќи до својата единаесетта победа. Откако Деј не се помрдна, стана јасно дека нешто не е во ред, па Конвел не се ни израдува на победата.
Веднаш беше пренесен во болница каде му беше направена итна операција на мозокот, но 27-годишниот американски боксер никогаш не се разбуди.
„Од име на семејството, од тимот на Патрик и луѓето блиски до него, благодарни сме ви за испратените молитви и пораки за поддршка и љубов кон Пат“, изјави неговиот промотор Лу Дибела веднаш по објавувањето на тажната вест.
„Патрик не мораше да боксува. Тој беше од добра фамилија, беше паметен, образован, имаше вредности и имаше други начини на кои можеше да заработува за живот. Сам одбра да боксува знаејќи го ризикот кој секоја борба го носи. Боксот е она што Пат уживаше да го прави. На тој начин инспирираше други луѓе и беше нешто што го правеше да се чувствува жив“, заврши Дибела.
Деј не е првата жртва во рингот годинава. Во јули за само неколку дена починаа двајца боксери. Прво Русинот Максим Дадашев (28), а по некој ден Аргентинецот Уго Алфредо Сантижан (23).
