Навивачите на Атлетико Мадрид жестоко го исвиркаа францускиот напаѓач Антоан Гризман во неговиот прв домашен натпревар по враќањето од Барселона, со што на некогаш најдобриот играч на овој клуб му стана јасно дека сѐ уште не му простиле за заминувањето во 2019 година.
Синоќешниот натпревар од Лигата на шампионите против Порто за Гризман не беше прв од неговото враќање во Атлетико Мадрид, бидејќи неодамна играше против Еспањол во Примера, но беше негов прв дома и веднаш доби јасен сигнал од навивачите какво е нивното моментално мислење за него.
Имено, тој влезе во игра во 56. минута наместо Жоао Феликс, а кога стапна на теренот, домашните навивачи на стадионот Ванда Метрополитано го пречекаа со жестоки свирежи, што најдобро го покажуваат видеата од натпреварот.
За нешто повеќе од 30 минути на теренот, Гризман не успеа да направи ништо или да им помогне на соиграчите да победат против Порто, а конечниот резултат гласеше 0:0.
Потсетуваме, Гризман одеднаш се врати во Атлетико Мадрид на позајмица во последните минути од летниот преоден рок, и овој клуб ќе може да го откупи неговиот договор следното лето за само 40 милиони евра, што е за 80 милиони евра помалку отколку што плати Барселона во 2019 година.
Следниот натпревар во Лигата на шампионите Атлетико Мадрид го игра против Милан на гостински терен, по што ќе игра против Ливерпул.
