Пет нови лица се дел од истрагата која се води околу обидот за убиство на пратеникот Зијадин Села.
Јавното обвинителствo извести дека за постапката што се води за настаните во Собранието од 27 април и нападот врз пратеникот и лидер на Алијансата за Албанците, Зијадин Села, надлежен јавен обвинител донесе наредба за проширување на истрага за уште пет лица за сторено кривично дело убиство во обид сторено во соизвршителство.
„Петте лица, по барање на надлежен јавен обвинител се лишени од слобода при вршење на претрес во нивните домови. Во текот на денот Обвинителството ќе презема дејствија за утврдување на факти и спрема останати лица“ извести ОЈО.
МВР во мај ги приведе лицата К.Ѓ. (39) и Ц.Ѓ. (68), татко и син, за кои полицијата утврди дека физички го нападнале и го влечеле лидерот на Алијанса за Албанците, Зијадин Села. По наредба на судија, полицијата тогаш извршила претрес на домот на К.Ѓ. при што биле „пронајдени и подигнати патики со траги слични на крв, облека и три мобилни телефони, кои со потврда за привремено одземени предмети му се одземени“. На двајцата им беше одреден притвор.