Сондата на Обединетите Арапски Емирати (ОАЕ) вчера успешно влезе во орбитата на Марс, како важен дел од првата арапска вселенска мисија.
Сондата на ОАЕ наречена Hope (Надеж) испрати сигнал откако влезе во орбитата на Марс, се наведува на официјалниот профил на вселенската агенција на ОАЕ на Twitter.
„Успех! Контактот е повторно воспоставен со леталото Hope. Неговото лансирање во орбитата сега е завршено“, напишаа тие на Twitter.
Успешното лансирање на вселенското летало Hope во орбитата на Марс е големо достигнување со оглед на тоа што многу вакви претходни мисии беа откажани поради лошите временски услови.
Така, ОАЕ станаа петтата земја во историјата што стигнала до Црвената планета, и прва меѓу арапските држави. Сепак, како што изјавија, нивните амбиции не застануваат тука.
Се очекува Hope да ја мапира атмосферата на Марс во текот на секое годишно време. Неговите три инструменти ќе соберат различни податоци за атмосферата со цел да се измерат сезонските и дневните промени, давајќи нови сознанија за тоа како функционира атмосферата на оваа планета.
Научниците сметаат дека ова може да придонесе за нашето разбирање за тоа како Марс изгубил голем дел од својот воздух, а со тоа и многу вода.
Вселенското летало Hope го започна своето патување до Марс минатата година, кога беше лансирано во јули заедно со американскиот ровер Perseverance кој треба да пристигне следната недела, и кинеското вселенско летало Tianwen-1 кое исто така вчера влезе во орбитата на Марс.
Сондата е тешка 1,3 тони и е лансирана со ракета Х-2А од јапонскиот космодром Танегашима. Тоа патување беше долго 500 милиони километри и роботското возило пристигна на целта во февруари годинава, како што се очекуваше.
Кинеската и арапската сонда ќе кружат околу Марс, додека американска ќе слета на Марс. Ова ќе биде прва фаза во деценискиот американско-европски проект за земање примероци од карпи за да се испита дали има докази за живот на микробите.
Сцените од патувањето на сондата Hope до Марс беа прикажани на Бурџ Калифа во Дубаи, највисоката зграда во светот, а другите култни згради низ ОАЕ светнаа црвено во чест на мисијата на Марс.
Сондата Hope во голема мера се смета за вселенско летало за инспирација - нешто што ќе ги привлече младите во ОАЕ и целиот арапски свет да започнат да се занимаваат со наука на училиште и за време на високото образование.
Сателитот е еден од многуте проекти за кои владата на ОАЕ вели дека ја означува нивната намера да ја оддалечат земјата од зависноста од нафта и гас кон иднина базирана на знаење, пишува CNN.
