Раководството на Манчестер Јунајтед утрово ја сподели веста дека Оле Гунар Солскјер, кој досега ја вршеше функцијата на в.д. тренер, сега е ангажиран како постојан тренер на клубот.
Норвежанецот доби тригодишен договор и ќе ја добие можноста да биде дел од тимот кој ќе биде одговорен за градење на тимот, купување на играчи и планирање за иднината.
Оле Гунар Солскјер беше назначен како в.д. тренер во декември, кога раководството реши да го отпушти Жозе Мурињо. Норвешкиот тренер и поранешен играч на Манчестер Јунајтед доби 14 од првите 19 натпревари на кормилото на овој клуб, што беше доволно за да ги увери сите од раководството, играчите и навивачите дека тој е вистинскиот избор за нов тренер.
„Од првиот ден кога пристигнав тука, се почувствував како дома. Чест ми е што го носев дресот на Манчестер Јунајтед како играч и што ја добив шансата да бидам тренер на овој голем клуб“, изјави утрово Солскјер.
Следниот натпревар на Манчестер Јунајтед доаѓа веќе оваа сабота, кога од 16:00 часот на Олд Трафорд ќе го пречекаат тимот на Ватфорд.
