Светот веќе неколку месеци се бори со пандемијата на COVID-19 предизвикана од SARS-CoV-2 вирусот. Земјите почнаа да ги олабавуваат рестриктивните мерки во одредени региони, а повеќе фармацевтски компании ги здружија силите за пронаоѓање вакцина против болеста.
Светот е во здравствена и финансиска криза, секојдневно расте бројот на забoлени, но и бројот на починати. Вирусот е закана за секоја земја. Светската здравствена организација објави дека во развој се над 140 вакцини во различни фази. Некои се во рана фаза, а некои веќе ќе влезат во трета фаза на тестирање.
Од тие 140 вакцини, засега 13 се тестираат врз луѓе. Кинеската компанија National Biotech Group соопшти дека првите резултати од тестирањето на една потенцијална вакцина против коронавирусот на луѓе укажува дека би можела да биде безбедна за употреба.
Како што пренесе Reuters, оваа експериментална вакцина довела до создавање на високо ниво на антитела кај сите 1.120 испитаници кои ја примиле во текот на првата фаза на клинички испитувања. Станува збор за втора вакцина од таа компанија што се покажа како делотворна во раната фаза на тестирање врз луѓе.
Кинеската компанија и истражувачите имаат одобрение да во земјата и во странство тестираат осум потенцијални вакцини, што ја прави Кина една од водечките земји во трката за развој на вакцина против коронавирусот.
За да добие која било вакцина дозвола за излегување на пазарот потребно е да се покаже ефикасна и во третата фаза на тестирање, во која нејзиното дејство се испитува на повеќе илјади луѓе, пренесе Reuters.
