По еднонеделното одложување конечно утре ќе се комплетира првото пролетно коло во чии рамки ќе се игра и Дербито на Македонија.
Минатата недела требаше да се одиграат шесте натпревари од 19. коло во Првата македонската фудбалска лига, но се одигра само саботниот натпревар помеѓу Академија Пандев и Работнички во кој гостите славеа 0:1 и тоа на снежни услови. Останатите пет натпревари кои беа закажани ден подоцна беа одложени откако снегот непрекинато паѓаше и се натрупа ширум републикава.
Натпреварот на колото е секако најголемото македонско дерби помеѓу вечните ривали, скопски Вардар и битолски Пелистер. Иако „Црвено-црните“ се наоѓаат во крајно лоша состојба со еден млад тим потпомогнат со неколкумина поискусни играчи, а згора на тоа пред само десетина дена ги почнаа зимските подготовки, додека „Зелено-белите“ располагаат со просечен тим кој е далеку од конкурентен, сепак ривалството си го прави своето па јавноста очекува добар фудбал и жестока пресметка. Директен пренос ќе има на МРТ1, а натпреварот ќе го суди познатиот интернационален судија Александар Ставрев.
Во другите натпревари, интересно се очекува да биде во Кратово каде незгодниот тим на Силекс ќе го пречека лидерот и најголем фаворит за титулата, тимот на тетовска Шкендија.
Шкупи важи за голем фаворит на гостувањето во Велес кај Борец, како што и од Ренова се очекува на домашен терен да се справи со последнопласираната Беласица, додека во Струга истоимениот домашен тим ги пречекува „Лавовите“ од Ѓорче Петров во натпревар на кој секој резултат е во игра.
Сите натпревари почнуваат во истиот термин од 14 часот.
Национална Арена „Тоше Проески“ во Скопје
Вардар - Пелистер
Судија: Александар Ставрев (Скопје)
Стадион „Силекс“ во Кратово
Силекс - Шкендија
Судија: Јован Качевски (Струга)
Стадион „Зоран паунов“ во Велес
Борец - Шкупи
Судија: Марјан Стојановски (Кичево)
Стадион „Градска плажа“ во Струга
Струга - Македонија ЃП
Судија: Крумислав Ѓорѓиев (Штип)
Стадион „Градски“ во Тетово
Ренова - Беласица
Судија: Стојанче Трпчевски (Кавадарци)
Табела:
- Шкендија 39
- Шкупи 33
- Македонија ЃП 33
- Струга 28
- Работнички 27
- Вардар 25
- Борец 25
- Силекс 22
- Ренова 19
- Пелистер 18
- Академија Пандев 17
- Беласица 9