За понеделник од 16 часот е најавен протест пред Јавното обвинителство во организација на Шанса за Центар и Зелен хумар град, а против изградбата на висококатниците на парцелата кај Холидеј Ин.
Во најавата на протестот организаторите истакнаа шест барања кои бараат надлежните власти веднаш да ги применат:
1. Запирање на градежните активности поради сомнеж за корупција и злоупотреби на службената должност ВЕДНАШ!
2. Јавното обвинителство најитно да се произнесе по иницијативата од Државната комисија за спречување на корупцијата.
3. Владата да одвои средства од централниот буџет доколку Општина Центар нема доволно за новомаалци да добијат решение и излез од нехуманите услови во кои живеат.
4. Советот на Општина Центар најитно да го изгласа елаборатот за суспензија за натамошно спроведување на овој ДУП.
5. Државниот инспекторат за градежништво и урбанизам најитно да спроведе надзор врз основа на претставката поднесена од Зелен хумар град.
6. За локацијата да се распише меѓународен конкурс со кој ќе се гарантира зелено и хумано решение.
Протестот ќе се одржи на Кеј на Вардар кај Филхармонија и со тоа нема да бидат блокирани улиците на градот.
Првично протестот беше закажан за петок, 3 декември, но поради погребот на загинатите од автобуската несреќа во Бугарија беше презакажан за в понеделник.