Италијански археолог ја спореди ерупцијата на Везув во 79 година со фрлањето атомска бомба во Втората светска војна.
Археологот Доменико Камардо вели дека уништувањето на Помпеја и блискиот Херкуланеум во ерупцијата на Везув во 79 година може да се спореди со судбината на Хирошима, на која беше фрлена атомска бомба во Втората светска војна.
Топлината на пирокластичниот бран кој пустошел покрај вулканот била помеѓу 400 и 500 степени Целзиусови, поради што крвта во телата на жртвите буквално зоврила.
„Посмртните останки на жртвите што ги најдовме се во слична состојба како и жителите на Хирошима. Навистина добивате чувство на ужас и трагедија“, рече Камардо, археолог од проектот за заштита на Херкуланеум.
Камардо ја направи споредбата опишувајќи го делумно осакатеното тело на жртва пронајдена во октомври на плажа во древниот град.
Археолозите веруваат дека маж на возраст од 40 до 45 години починал на неколку чекори од водата обидувајќи се да избега од ерупцијата. Во раката држел мала торбичка со дрвена кутија, од која ѕиркал прстен од железо или бронза.
„Можно е да бегал со своите скапоцености. Најдовме други предмети како што се остатоци од ткаенина, кои мора внимателно да ги отстраниме пред да ги проучуваме“, објасни Нунција Лаино, конзерваторка која ќе ги анализира остатоците кога ќе бидат преместени во лабораторија.
Коските имаат црвеникава боја од крвта на жртвата, објасни Франческо Сирано, директор на Археолошкиот парк Херкуланеум.
Остатоците од човекот се пронајдени како дел од првото археолошко ископување во последните 30 години во Херкуланеум, помалку познато место во близина на Помпеја.
