Американската фармацевтска компанија Moderna објави дека нејзината вакцина против COVID-19 се покажала 96 проценти ефикасна кај деца на возраст од 12 до 17 години.
Две третини од 3.235 учесници кои учествувале во клиничките испитувања во САД примиле вакцина, а третина добиле плацебо.
Студијата покажала ефикасност против COVID-19 од 96 проценти. Вакцината mRNA-1273 општо добро се поднесува, а досега не е забележано нешто сериозно што би поставило прашања околу безбедноста на вакцината, соопштија од компанијата.
Како дел од испитувањето, откриени се 12 случаи на коронавирус 14 дена по првата доза. Резултатите се темелат на следење испитаници во просек 35 дена по втората доза на вакцина.
Фармацевтската компанија вели дека нуспојавите биле „благи или умерени“, најчесто болка на местото на убодот. По втората доза нуспојавите вклучувале „главоболка, болки во мускулите и треска“, слично како кај возрасните кои примиле вакцина.
„Досега не се утврдени сериозни причини за загриженост во поглед на безбедноста на вакцината“, се вели во студијата.
Засега, вакцината е одобрена за луѓе постари од 18 години. Moderna наведува дека е во разговори со регулаторите во поглед на потенцијални измени и дополнувања во регулаторните пријави со цел да се одобри вакцината за оваа возрасна група.
