Сегашните вакцини против COVID-19 веројатно се ефективни во спречување на тешки облици на болеста и хоспитализација по заразување со омикрон варијантата на коронавирусот, изјави јужноафрикански експерт за заразни болести.
Професорот Салим Абдул Карим исто така изјави дека е прерано за да се каже дали омикрон предизвикува потешки симптоми од претходните варијанти. Сепак, изгледа дека полесно се пренесува и поголема е веројатноста од зараза на луѓе кои се вакцинирани или претходно ја прележале болеста.
„Според тоа што го знаеме и како другите загрижувачки варијанти реагираа на имунитетот од вакцините, може да очекуваме висока ефективност на вакцините кога станува збор за хоспитализација и тешко заболување и дека заштитата од вакцините веројатно ќе остане силна“, изјави Абдул Карим на прес-конференција.
„Спречувањето на тешка форма на болеста е задача на Т-клетките на имуниот систем, кои се разликуваат од антителата. Па, дури и ако вирусот им побегне на антителата, тешко дека ќе им избега на Т-клетките“, објасни тој.
Предупреди дека се очекува пораст на заразените во Јужноафриканска Република до крајот на неделата.
„Очекувам до крајот на неделата бројката да надмине 10.000 заразени на ден, а притисок во болниците ќе имаме за две до три недели“, изјави тој.
