Ван Нистелрој бесен на судиите: Не бевме поразени во Фергиево време туку во офсајд

Прославениот напаѓач на Манчестер Јунајтед, Руд ван Нистелрој, кој сега е менаџер на Лестер, беше огорчен откако беше исфрлен од ФА купот од „Црвените ѓаволи“.

Јунајтед победи со гол во 3. минута од судиското надополнување по очигледен офсајд, а Ван Нистелрој жестоко ги прозва судиите по натпреварот.

„Не загубивме во Фергиевото време, туку во времето во офсајд. За ова не е потребен ВАР, потребен ви е ВАР кога станува збор за ситуација која не е видлива со голо око. Мегваер беше на половина метар офсајд, линијата е јасна. Тешко е затоа што тимот заслужи нерешено на крајот и продолженија. Ќе останевме во игра не знаете што би можело да се случи“, рече поранешниот напаѓал на Јунајтед и додаде.

„Тоа беше многу добар тимски настап. Почнавме навистина добро, го притискавме Јунајтед секогаш кога ја имаше топката, бевме константни и заслуживме да одиме на пауза со водство од 1:0. Знаевме дека Јунајтед ќе притисне во вториот дел и ќе има неколку шанси, но немаше многу такви, па заслуживме да одиме во продолженија каде што можевме да одиме понатаму. Вакви одлуки е тешко да се проголтаат“.

Холандскиот стручњак алудираше на головите кои Јунајтед ги постигнуваше во самиот финиш на натпреварите под водство на легендарниот Сер Алекс Фергусон. Оттаму стана популарен изразот Фергиево време.

Имено, Англиската фудбалска асоцијација пред почетокот на натпреварувањето оваа сезона одлучи ВАР да се користи од 5. коло на ФА купот. Така, Манчестер Јунајтед профитираше, а Лестер беше оштетен со оваа одлука.