Фудбал

ВАР: Венгер предлага мала промена во офсајд правилото

19. февруари 2020 - 19:37 | Ф.З.

Арсен Венгер денес работи во ФИФА и вели дека има идеја како да го реши проблемот со милиметарските офсајди кои сe судат благодарение на ВАР.

Откако се воведе ВАР беа поништени еден куп голови поради офсајд кој голото око не може да го забележи.

„Зборувам за офсајдите кои се поради дел од сантиметар. Можеби има простор малку да се промени офсајд правилото да не биде дека нечиј нос бил во офсајд“, смета поранешниот долгогодишен предводник на Арсенал.

Улогата на Венгер во ФИФА вклучува и работа при техничкиот панел во ИФАБ, која е задолжена за дефинирање на правилата на игра. Токму ИФАБ за точно десет дена ќе одржи состанок во Белфаст, Северна Ирска, на кој многу веројатно тема ќе биде и проблемот со милиметарскиот офсајд на ВАР.

Во моментов, играч е во офсајд доколку било кој дел од неговото тело со кој може да постигне гол е пред последниот играч од противничката екипа. Рацете не се рачунаат.

Венгер смета дека сѐ уште нема доволно специјалисти за ВАР, како и дека повеќе поранешни судии и искусни фудбалери треба да бидат вклучени во решавањето на овој проблем кој ја убива играта.

Коментирај