Вардар го назначи Седлоски за нов тренер, четврти сезонава

Гоце Седлоски е новиот тренер што ќе се обиде да го спаси последнопласираниот Вардар откако кратко траеше и авантурата на Срѓан Захариевски.

По поразот во Дербито на Македонија во Битола од Пелистер, Захариевски спогодбено го раскина договорот со најтрофејниот македонски клуб.

Утринава клубот на Х објави дека нов предводник е поранешниот репрезентативец Гоце Седлоски.

„АД ФК Вардар го назначи Гоце Седлоски за нов шеф на стручниот штаб на клубот“, стои во краткото клупско соопштение.

Популарниот Седло е дури четврти тренер што ќе седне на клупата на Вардар оваа сезона, од која поминаа 13 кола. Претходно „Црвено-црните“ ги предводеа Горазд Михаилов, Горан Петрески и Срѓан Захариевски.

Седлоски веќе беше тренер на Вардар од 2015 до 2017 кога успеа двапати да ја освои титулата во првата лига. Тогаш на располагање имаше силен тим и голем буџет, а сега доаѓа во тешки времиња.

Првиот предизвик за Седлоски ќе биде веќе в сабота кога Вардар на домашен терен ќе го пречека лутиот ривал од преку реката - Шкупи. Потоа следува репрезентативна пауза, период што добро ќе му дојде на новиот тренер за анализи и можеби некоја пријателска.

Последен ангажман на Седлоски беше во Работнички каде минатата сезона се задржа кратко, водејќи ги „Романтичарите“ на 11 натпревари на средина на сезоната.