Вардар имаше лошо прво полувреме, но успеа и по вторпат да ја совлада Војводина, овојпат со 32:26 за да се пласира на Фајнал фор турнирот на регионалната СЕХА лига, приклучувајќи му се на Еурофарм Пелистер, кој со две победи го елиминираа Татран.
Во другите две четвртфиналиња, хрватските ривали Загреб и Нексе уште го немаат одиграно ниту првиот меч, додека Партизан го доби првиот натпревар против јуниорите на Веспрем со 39:24.
Иако Вардар имаше огромна предност од 13 гола (38:25) од првиот натпревар, почетокот на дуелот во Нови Сад беше кошмарен за „Црвено-црните“. Војводина поведе со 6:1 по 8 минути игра, а на полувреме имаа 15:11 водство. Сепак, потоа Вардар ја врати рамнотежата и до крајот на натпревар стигна до убедлива победа.
Гоце Георгиевски со 10 гола и Јан Чувара со 7 беа најдобри кај „Црвено-црните“, додека за Војводина, Симо Шијан уфрли 9 гола.
