Напаѓачот на Лестер, Џејми Варди, рекол дека тој и неговото семејство добивале смртни закани, откако минатиот месец менаџерот Клаудио Раниери добил отказ.
Италијанецот Клаудио Раниери девет месеци по сензационалното освојување на титулата во Премиер лигата, поради лошите резултати во новото првенство доби отказ, а медиумите посочија дека Варди бил еден од фудбалерите кои барале менаџерот да биде отпуштен.
„Некаде прочитав дека по натпреварот со Севилја сум бил на некаков состанок, а јас во наведениот период три часа бев во собата за допинг. Луѓето измислија многу работи, потоа тоа медиумите го пишуваат и јас добивам смртни закани. И не само јас, бидејќи им се закануваат на моите деца, на мојата сопруга. Да бидам искрен секојдневно добивам закани. Навивачите не ме сакаат“, ја пренесува BBC изјавата на Варди.
Тој дополнил дека лично нема проблеми да се носи со ситуацијаta, но дека целата приказна многу влијае врз неговото семејство.
„Не е ниту малку пријатно кога некој ќе се обиде да го „пресече“ патот на автомобилот кој го вози вашата сопруга, а децата се на задното седиште. Тоа се има случено многу пати и тоа е застрашувачки“, дополнил Варди.
Напаѓачот рекол дека се обидува да ги игнорира работите кои се случуваат по заминувањето на Раниери и дека се фокусира на борбата за опстанок во Премиер лигата и четвртфиналниот дуел со Атлетико Мадрид во Лигата на шампионите.
