Од таборот на Тиквеш на денешната прес-конференција пред утрешното европско деби истакнаа дека се среќни што нема да играат на скопските горештини, но и дека се оптимисти дека ќе имаат долго европско лето.
„Верувајте, нам многу ни значи што ќе играме во вечерен термин. Искрено, и јас сум среќен што ќе играме навечер кога нема да биде екстремно топло. Како играчи, не ни е исто дали играме од 5 часот или од 8 и пол, има голема разлика. Новиот термин значи и поголема посетеност, на што и се надеваме за добра поддршка од трибините. Нормално дека на реваншот времето ќе биде друго бидејќи Исланд е на север, но за тоа потоа“, рече капитенот на Тиквеш на нашето прашање за промената на трерминот на одигрување на натпреварот.
УЕФА вчера информираше дека поради високите температури во Скопје, кои достигнуваат до 40°C, одлучила почетокот на натпреварот од 17 часот да се помести за од 20:30.
Тренерот Ѓорѓи Мојсов, пак, е оптимист кога станува збор за европското лето на кавадарчани. Тој верува дека Бреидаблик може да се помине, но и противникот во второто коло, косовска Дрита.
„Искрено, се надеваме и веруваме дека ќе се гледаме повеќе пати на европската сцена ова лето. Се подготвуваме за овој историски дуел за Тиквеш силно верувајќи дека може да одиграме квалитетни натпревари. Добро се подготвивме за противникот, одлично е анализиран и верувам дека ако го испочитуваме она што го договоривме на тренинзите, тогаш сигурно ќе продолжиме во наредното коло. Јас верувам дека Тиквеш може да мине неколку кола на европската сцена, го гледам клубот во Европа и по Бреидаблик и по Дрита“.
Натпреварот Тиквеш - Бреидаблик се игра в четврток од 20:30 часот на Националната арена „Тодор Проески“ во Скопје. Билетите ќе се продаваат на билетарницата на стадионот на денот на натпреварот.
