Во својата 94-годишна историја Тиквеш за прв пат се наоѓа во ваква шанса да се бори за трофеј. На денешната прес-конференција капитенот Александар Вареловски ги истакна очекувањата не само на тимот, туку на цело Кавадарци.
„Тиквеш има голема традиција, а сега прв пат ќе играме и во финалето на Купот. Ќе дадеме сѐ од себе, па и повеќе од тоа, за да слави цело Кавадарци. Подготвени сме, имаме позитивен притисок и навистина се надевам дека победа во финалето ќе биде круна на успешната сезона“, рече Вареловски, инаку родум токму од Кавадарци.
Тиквеш е еден од најстарите активни клубови, формиран во далечната 1930 година во тогашното Кралство Југославија. Поминал многу, но никогаш не бил во ситуација да се бори за пехар со ваква тежина. Има две титули републички шампион во Југославија, но тоа се титули во третото по ранг натпреварување на поранешната држава. Има титула и шампион на 3.МФЛ Југ и на 2.МФЛ, но сите се тие мали потфати споредено со Купот на Македонија.
„Ова е мое прво финале во кариерата. Се надевам декла ќе го кренам, пехарот. Кога по 17 години Тиквеш се врати во првата лига, во Кавадарци имаше неверојатно славје. Замислете што ќе биде сега ако од Скопје се вратиме со пехарот, ќе биде нешто незаборавно“, додаде Вареловски на нашето новинарско прашање што за кавадарчани ќе значи куп титула по 94 години од основањето на клубот.
Тиквеш и Воска Спорт куп финалето ќе го одиграат утревечер од 19 часот на Националната Арена „Тодор Проески“ во Скопје. Билетите се веќе во продажба преку MKTickets, а на денот на натпреварот ќе може да се купат и на билетарницата на стадионот.
