Еврокомесарот за проширување се обрати пред Европскиот парламент на комеморацијата на 25-годишнината од геноцидот во Сребреница, нарекувајќи ја ‘отворената рана’ на Европа.
Вархеји потсети дека два меѓународни судови го квалификуваа масакрот на 8 илјади мажи од страна на српските босански воени сили геноцид и увери дека Европа не ги заборава ниту жртвите, ниту нивните семејства.
– Европа потфрли во Сребреница и сега се соочуваме со нашиот срам. Геноцидот останува отворена рана во срцето на Европа и продолжува да нѐ прогонува, продолжува да нѐ потсетува на нашата заедничка одговорност, наша обврска е да се сеќаваме на Сребреница за секогаш, наша должност исто така е да се осигураме дека ќе биде донесена правда, рече еврокомесарот за проширување.
– Сега е поитно од било кога одговорните за воени злосторства во Сребреница да се соочат со последиците на нивните дела, додаде Вархеји во име на Европската комисија и предупреди дека секаков историски ревизионизам е неприфатлив.
За ЕК, помирувањето во регионот на Западен Балкан мора да биде приоритетен и реториката на омраза е неприфатлива.