Фотографиите што ги објавувате на Instagram може да кажат повеќе за вас од тоа што сте јаделе, каде сте биле и дали сте уживале на летување. Објавите на оваа социјална мрежа може да покажат и дали сте во депресија.
Едно најново истражување што го спроведоа научници од универзитетите Харвард и Вермонт укажува дека луѓето со историја на депресија споделуваат повеќе фотографии, користат помалку филтри и објавуваат фотографии во темни и сиви нијанси.
Во резултатите од истражувањето се наведува дека Instagram и другите социјални мрежи може да бидат одлична алатка за истражување на менталната состојба на луѓето. Претходни истражувања покажаа дека зборовите што ги употребувате во објавите на Twitter и Facebook може да укажат дали сте или не сте во депресија.
Новото истражување покажа дека истото може да се увиди и врз основа на визуелните содржини што ги објавувате.
Научниците анализирале повеќе од 43.000 фотографии од 166 корисници од кои 71 имале историја на депресија.
Со помош на машина ги анализирале боите, светлината, филтрите и сите други алатки што се користат за обработка на фотографии.
Откриле дека луѓето кои се во депреија објавуваат повеќе фотографии што се потемни, со сиви, сини или црни нијанси.
Овие луѓе исто така помалку користеле филтри, а ако веќе ги користеле избирале Inkwell, филтер за црно-бела обработка на фотографијата.
Психички стабилните личности најмногу ја сакаат опцијата Valencia што ги осветлива фотографиите. Луѓето кои се во депресија почесто го фотографираат сопственото лице, односно прават селфија, за разлика од луѓето кои не се депресивни и објавуваат различни фото содржини.
Во истражувањето е нагласени дека реултатите не се однесуваат на сите корисници на Instagram и дека иако биле анализирани илјадници фотки, тие сепак биле објавени од релативно мал број луѓе во споредба со бројот на корисници на социјалната мрежа.
Во истражувањето биле вклучени луѓе кои се активни на Instagram и им дозволиле на научниците да имаат увид во нивните здравствени картони.