Познатиот хрватски дневен весник излезе со интересна приказна како градот на бреговите на Охридското Езеро има свое место во успехот кој Хрватите го испишуваат во Катар.
„Градот со 33 илјади жители на југозападот на Македонија е значајно место во историјата на хравтскиот фудбалот“, почнува познатиот Večernji list кој излегува во Загреб од 1959 година и кој Хрватите милуваат да го наречат Večernjak.
„Ватрените“ слават нов голем успех со пласманот во четвртфиналето на Мундијалот во Катар, а во контекст на победата над Јапонија - македонскиот град Струга е историско место на хрватскиот фудбал. На 16 октомври 2005 година, односно пред повеќе од 17 години, за прв пат во записниците на ХНС беше спомната оската што го произведе гол против Јапонија, Ловрен-Перишиќ. Тие два „ватрени“ заштитни знаци за првпат, сè уште голобради, ги спои селекторот Станислав Вугринец од Вараждин, во селекцијата до 17 години која ја победи Македонија со 2:0, пишува авторот на текстот, Томислав Дасовиќ.
Головите на тој натпревар ги постигнаа Милан Бадељ и Томислав Хавојиќ. Ловрен го одигра целиот натпревар, а Перишиќ влезе во игра во 57. минута. Еве го целиот состав, Дејан и Иван со задоволство ќе ги паметат своите соиграчи: Божидар Радошевиќ, Милан Бадељ, Дејан Ловрен, Тони Качуниќ (46' Томислав Хавојиќ), Јосип Пивариќ (88' Томислав Барбариќ), Адам Сушац, Ален Шимуниќ, Енор Пулиќ (57' Иван Перишиќ), Игор Југовиќ, Матија Смрекар, Санди Худоровиќ. Неискористени замени останале Миро Варводиќ; Михаел Пазман, Матео Пољак и Иван Чориќ.
Натпреварот се играл на стадионот „Градска плажа“, дом на Караорман, каде денес игра и лидерот во 1.МФЛ, тимот на Струга.
Ловрен и Перишиќ, заедно со Домагој Вида, денес се единствените остатоци од генерацијата родени 1989 година. Од нив меѓу сребрените „Ватрени“ во 2018 беа и Пивариќ и Бадељ. Генерацијата од 1995 година е најзастапена во денешната хравтска репрезентација: Ливаковиќ, Пашалиќ, Јурановиќ, Ивушиќ.