За првпат во историјата на дуелите помеѓу Лацио и Рома ќе нема публика на трибините, а првпат и двајца шпански голмани ќе бидат помеѓу стативите.
Вечерва од 20:45 часот на „Олимпико“ ќе се отвори 18. коло во Серија А со познатото Дерби дела Капитале помеѓу вечните ривали Лацио и Рома.
Но, ќе се игра пред празни трибини, поради веќе познатата причина. Тоа ќе биде првпат во 91-годишната историја на ова дерби да нема публика.
Минатата сезона двете дербија се играа пред прекинот, а второто беше на 26 јануари. И двете завршија со ист резултат од 1:1.
Ова ќе биде дерби број 155 во Серија А. Лацио има 39 победи, Рома има 55, а 60 натпревари завршиле нерешено. Првото римско дерби е одиграно на 8 декември 1929 година кога Рома како гостин победила со минимални 1:0.
Интересно, но вечерва за првпат на двата гола ќе бидат шпански голмани. Пау Лопес е стандарден кај Рома, додека кај Лацио поради повреда не може да брани албанскиот репрезентативец Томас Стракоша, па помеѓу стативите ќе застане шпанскиот ветеран Пепе Реина.
Натпреварот ќе го суди Даниеле Орсато.
