Дојде време и за завршницата од втората сезона на Лигата на нации - вечерва во Милано копјата ќе ги вкрстат моќните Италија и Шпанија.
Вечера од 20:45 часот на „Џузепе Меаца“ стадионот во Милано се игра првото полуфинале од завршницата на Лигата на нации, чиј домаќин на овој фајнлфор е Италија. Бранителот од претходното деби издание, Португалија, не успеа да се најде на завршницата, па дефинитивно Европа ќе добие нов победник во ова ново натпреварување. Утревечер на програмата е второто полуфинале во кое играат Белгија и Франција, а кое ќе се игра на „Алианц“ стадионот на Јуве во Торино.
И двата селектора вечер ќе истрчаат без некои од своите важни играчи, но влогот е голем, па и тие што ќе играат ќе мора да ја прифатат одговорноста. Голем проблем за „Аѕурите“ претставува отсуството на голгетерите Чиро Имобиле од Лацио и Андреа Белоти од Торино, двајца кои беа важна алка во освојувањето на ЕУРО 2020. Кај „Црвената фурија“ недостасуваат Маркос Љоренте, Педри и Хосе Гаја, а Алваро Мората не доби повик поради лоша форма.
Италија: Донарума; Ди Лоренцо, Бонучи, Кјелини, Емерсон; Барела, Жоржињо, Верати; Кјеза, Распадори, Инсиње.
Шпанија: Симон; Аспиликуета, Лапорт, Пау Торес, Регилон; Коке, Бускец, Форналс; Феран Торес, Ојарсабал, Сарабиа.
Роберто Манчини:
„Имаме некои проблеми во нападот бидејќи поради повреди ни недостасуваат напаѓачите од ЕУРО. Сега имаме двајца млади напаѓачи во Распадори и Кин, ајде да видиме како ќе ги употребиме. Шпанија својот најдобар натпревар на ЕУРО го одигра против нас. Ни создадоа многу проблеми со поседот, но тие за тоа и се мајстори. Се мачевме, иако двата тима имаа сличен број на шанси. Мора да одиграме одличен натпревар“.
Луис Енрике:
„Големо задоволство претставува што повторно сме во Италија. Имав одлична година тука како тренер на Рома - ја обожавам храната, кафето, јазикот, сонцето, барем од Рим надолу, и мислам дека овие две репрезентации се многу слични. Мојот план, како и секогаш, е да нападнаме од почетокот и да играме амбициозно. Има многу играчи кои не можеа да ни се придружат и жалам за нив, но тука сме со добар состав“.
Натпреварот ќе го суди Русинот Сергеј Карасјов, а директен пренос македонските фудбалски вљубеници ќе можат да следат на Sportklub 1.