Англискиот напаѓач Вејн Руни изјави дека постоеле пет играчи, наречени „Петмината од Керингтон“, чиј глас ја контролирал соблекувалната на Манчестер Јунајтед во годините кога тимот беше предводен од Сер Алекс Фергусон.
Вејн Руни е најдобриот стрелец на Манчестер Јунајтед и англиската репрезентација на сите времиња, но неговото најголемо достигнување е фактот што успеа да се наметне како лидер на една од најуспешните генерации на клубот.
Тој вели дека во Манчестер Јунајтед постоеле петмина играчи кои биле задолжени со одржување на атмосферата и дисциплината во соблекувалната. Поточно, нивната задача била да го одржуваат балансот помеѓу различните карактери во соблекувалната и на теренот, како и да го зајакнат клупскиот идентитет.
„Сер Алекс не мораше да се грижи за атмосферата во соблекувалната, бидејќи ние ги имавме работите под контрола. Играчите како Рајан Гигс, Гери Невил, Пол Сколс и Рио Фердинанд имаа долг стаж во Јунајтед а јас, заедно со нив, се грижев за сѐ да се одвива во најдобар ред“, изјави Вејн Руни.
Коментарите на Руни доаѓаат во време кога медиумите пренесуваат дека односите во соблекувалната на Манчестер Јунајтед се во многу лоша состојба. Пол Погба од поодамна не е во добри односи со тренерот Жозе Мурињо, а последните гласини велат дека Алексис Санчез побарал да си замине од клубот.
Викендов Манчестер Јунајтед оди на гостување во Лондон, каде ќе се сретне со Челзи, кој во моментов е лидер на табелата во Премиер лигата. Во случај на пораз, Жозе Мурињо може да почне да си ги пакува куферите за заминување од Олд Трафорд.